Taiwan
.svg)
Taiwan, officialmente le Republica de China (RdC), es un pais in Asia Oriental. Illo es situate al junction del Mar de China Oriental e le Mar del Sud in le nord-west del Oceano Pacific, con le Republica Popular de China (RPC) al nord-west, Japon al nord-est, e le Philippinas al sud. Le territorios controlate per le RdC consiste de 168 insulas con un area combinate de 36193 kilometros quadrate (13974 millias quadrate). Le insula principal de Taiwan, etiam cognoscite como Formosa, ha un area de 35808 kilometros quadrate (13826 millias quadrate), con catenas de montanias que domina le duo tertios oriental del pais e planos in le tertio occidental, ubi su population multo urbanisate se concentra. Le capital, Taipei, insimul con le citate de Nove Taipei e Keelung, forma le area metropolitan le plus grande de Taiwan. Altere citates importante include Taoyuan, Taichung, Tainan, e Kaohsiung. Con circa 23,9 milliones de habitantes, Taiwan es inter le paises le plus densemente populate in le mundo.
Taiwan es habitate desde al minus 25.000 annos. Ancestres del populos indigena taiwanese se installava in le insula circa 6000 annos retro. In le seculo 17, un immigration chinese de grande scala (specificamente le Hakkas e Hoklos) al west de Taiwan comenciava sub un colonia nederlandese e continuava sub le Regno de Tungning, le prime stato chinese han in le historia taiwanese. Le insula esseva annexate in 1683 per le dynastia Qing de China e cedite al Imperio de Japon in 1895. Le Republica de China, que habeva revertite le Qing in 1911, prendeva le controlo de Taiwan post le rendition de Japon in 1945. Japon renunciava al soveranitate super Taiwan in 1952. Le immediate reprisa del Guerra Civil Chinese resultava in le perdita del continente chinese al fortias communista, que establiva le Republica Popular de China e le fuga del governamento central del ROC a Taiwan in 1949. Le jurisdiction effective del ROC desde ille tempore ha essite limitate a Taiwan, Penghu, e insulas minor.
In le prime annos 1960, Taiwan entrava in un periodo de rapide crescimento economic e industrialisation, nominate le "Miraculo de Taiwan". Al fin del annos 1980 e initio del annos 1990, le ROC se transformava de un stato con un sol partito sub lege martial a un democratia multipartitista, con presidentes eligite democraticamente desde 1996. Le economia industrial taiwanese orientate al exportation es le 21me plus grande del mundo per PIB nominal e le 19ne plus grande per mesuras de PPA, con un concentration super le production de aciero, machineria, dispositivos electronic, e productos chimic. Taiwan es un pais disveloppate, classificate como le 20me plus alte in terminos de PIB per capita. Illo es classificate alte in terminos de libertates civil, sanitate e disveloppamento human.
Le RdC non representa China como membro del Nationes Unite post le voto de 1971 del membros del ONU pro recognoscer le RPC in su loco. Le RdC retene su demanda de esser le sol representante legitime de China e su territorio, ben que isto ha essite reducite post su democratisation in le annos 1990. Taiwan es revindicate per le RPC, que refusa de establir relationes diplomatic con paises que recognosce le RdC. Taiwan mantene relationes diplomatic official con 13 de 193 paises membros del ONU e con le Sancte Sede, ben que multe alteres mantene relationes diplomatic non official via officios representative e institutiones que functiona como ambassadas e consulatos de facto. Le organisationes international in le quales le RPC participa refusa accordar le membrato a Taiwan o permitte su participation solmente sub un nomine non statal. In le pais, le principal contention politic es inter partitos que favori un eventual reunification con China e que promove un identitate pan-chinese, contra illes que aspira a un recognition international formal e que promove un identitate taiwanese. Usque le seculo 21, ambe partitos ha modificate lor positiones pro ampliar lor attraction.
