Langobarts

I Langobarts (dal latin langobardi, salacor leât a lis barbis lungjis o a lis armis) a forin un popul gjermanic, vignût probabilmentri jù de Scandinavie. In altris lenghis a son ancje cognossûts come lombarts, di dulà che al ven il non Lombardie, che al inizi indicave la regjon dulà che a stavin i Langobarts.
Storie
[cambie | modifiche il codiç]
La storie dai Langobarts e je avonde scure, e la font plui impuartant e je la Historia Langobardorum, opare scrite dal frari cividalês Pauli Diacun tal secul VIII, e basade su lis informazions de Origo Gentis Langobardorum, une opare tramandade par vie orâl. Pauli Diacun al spieghe come il non origjinari dai Langobarts al jere Winnili; si insedarin tal I secul te Gjermanie, nomenâts ancje dal storic roman Tacit tal 98 d.C.. Fin al cuart secul a restarin plui che altri pastôrs; po, sburtâts des popolazions che a rivavin dal Est, a scugnirin spostâsi viers sud, in Austrie e in Panonie.
Tal 568 d.C., sot dal comant dal re Alboìn, a traviersiarin lis Alps Juliis par invadi la penisule italiche, insiemit cun altris popui gjermanics (Bavars, Bulgars, Sassons). Secont la liende, Alboìn al viodè pe prime volte la planure furlane de mont Matajûr. Chestis tieris a jerin pene stadis tornadis a concuistâ dai Bizantins, che a vevin parât vie i Ostrogots, ma la resistence e fo scjarse. Tal 569 d.C. i Langobarts a cjapin la prime citât impuartante, Forum Iulii, ven a stâi Cividât, che aromai e jere la citât orientâl plui grande daspò de ruvine di Aquilee. I Langobarts a stabilissin ca il prin ducat, chel dal Friûl, che Alboìn i da in man al nevôt Gjisulf. Dopo di chest i Langobarts a van indenant, a concuistin Vicenze, Verone e Pavie di Milan, che e devente la capitâl dal ream langobart; la penetrazion e va po indenant a Sud, cui Bizantins che a tegnin nome Ravene, Rome e zonis su la cueste.
I Langobarts e il Friûl
[cambie | modifiche il codiç]Il ducat dal Friûl al reste un dai plui impuartants di dut il ream, e di Cividât a vegnin putrops rês. La citât e manten ancjemò vuê un patrimoni langobart, come il Templi e il Museu, che no àn paragons tal rest de Italie.
La influence culturâl langobarde
[cambie | modifiche il codiç]La influence culturâl dai Langobarts sul Friûl e samee mancul significative di ce che si pues pensâ. Par esempli par furlan lis influencis langobardis a son limitadis plui che altri al lessic, ma chest al è forsit dovût al fat che la formazion dal furlan e ven plui tart, ator dal an Mil, e ancje al fat che, viodût che i Langobarts no jerin tancj, la influence fûr des citâts no à di jessi stade fuartone, sicheduncje la int e continuave a fevelâ e a compuartâsi come prime. Dal pont di viste des fiestis furlanis, par esempli il pignarûl, secont i studiôs, a son di origjins plui antighis, forsit celtichis.
Cronologjie essenziâl dal Ducât dal Friûl (568-776)
[cambie | modifiche il codiç]- 568: Alboin al rive in Italie e al fonde il prin ducât langobart a Cividât (Forum Iulii), afidant il podê a sô nevôt Gisulf I.
- 610: Incursion devastante dai Avars te planure furlane: il duche Gisulf II al mûr in bataie e Cividât che ven sachegjade.
- 663: Il duche Lupus al tente une ribelion cuintri il re Grimoalt, ma al ven batût e stramortît cun il jutori dai Avars.
- 700-739: Guvier dal duche Pemmone dal Friûl, periodi di pâs interne, di difese dai cunfins orientâls e di floriditât culturâl (Rinassiment langobart).
- 739-744: Ratchis, fî di Pemmone, al devente duche dal Friûl e plui tart re dai Langobarts (744). So fradi Aistulf al cjape il podê a Cividât e plui tart al devente re ancje lui (749).
- 774: Colade di Pavia e fin dal Ream Langobart par man di Carli il Grant. Il Friûl al reste un ducât autonomo par un curt periodi.
- 776: Ribelion dal duche Rodgaut dal Friûl cuintri i Francs. Carli il Grant al sdrume la rivolte, al abolìs il Ducât dal Friûl e al trasforme il teritori te Marcje dal Friûl.
I Ducâts e la organizazion dal Ream
[cambie | modifiche il codiç]Cjale ancje Storie dai Langobarts
Il Ream dai Langobarts in Italie al jere dividût in dôs grandis zonis gjeografichis e aministrativis:
Langobardia Maior (tal Nôrd e Centri-Nôrd)
[cambie | modifiche il codiç]- Il Ducât dal Friûl (il prim e un dai plui potents, cun cjaf-lûc a Cividât).
- I ducâts de Padanie e de Toscane (Verone, Trent, Bresse di Milan, Berghem, Pavie di Milan — cjaf-lûc dal Ream —, Luche).
Langobardia Minor (tal Sud Italie)
[cambie | modifiche il codiç]- Il Ducât di Spolêt.
- Il Ducât di Benevent (che al restà indipendent ancje daspò de colade dal Ream di Pavie intal 774).
Bibliografie
[cambie | modifiche il codiç]- Pauli Diacun, Historia Langobardorum (Storie dai Longobards), secul VIII.
- Paul Picotti, I Longobardi in Italia, Udine, 1990.
- Stefano Gasparri, I duchi longobardi, Roma, 1978.
- Wilfried Menghen, Die Langobarden. Archäologie und Geschichte, Stuttgart, 1985.
- Gian Carlo Menis, Storia del Friuli. Dalle origini alla caduta del Patriarcato, Udine, 2002.