Ir al contenido

Mollusca

De Biquipedia
Articlo d'os 1000
Mollusca
Tonicella lineata
Denominacions populars
moluscos
Clasificación cientifica
Eukaryota
Animalia
Lophotrochozoa
Mollusca
Clases
Clases de Mollusca:

Os moluscos[1] (nombre cientifico Mollusca) constituyen un filo d'animals invertebraus. Se conoixen bellas 93.000 especies vivents, feito que fa que sía o filum marín mas numeroso, contiene un 23% de toz os organismos marins. Os representants d'iste filo viven en un rango d'habitats muit amplo incluyindo o medio marín, l'augua dolza y medio terrestre. Os moluscos son un grupo muit diversificau, en mida, en anatomía estructural, comportamiento y habitat. A ciencia que estudia os moluscos se diz malacolochía[2]

O filo por un regular se divide en nueu u diez clases taxonomicas, d'as que dos son extintas de tot. Os gasteropodos (caragols y limacos) son por muito os moluscos mas numerosos d'as especies clasificadas, y suman o 80% d'o numero total d'especies de moluscos conoixidas. Os moluscos cefalopodos, como os calamars, xipias y polpos, se troban entre os invertebraus con un sistema neurolochico mas enantau. U bien o calamar chigant o bien o calamar colosal ye o invertebrau mas gran conoixiu.

Os moluscos son protostomaus con cuerpo tovo y insegmentau, con simetría bilateral, (de fueras d'os gasteropodos), y celoma muito redueito, (ocupa cuasi exclusivament a cambra pericardica y gonadal). O cuerpo ye dividiu en 3 rechions morfolochicas: cabeza, piet y masa visceral.

  • Cabeza: presenta boca, centros niervosos cerebroides y cualques organos sensorials.
  • Piet: ye una modificación d'a part ventral, ye muscloso y gosa tener funcions locomotoras.
  • Masa visceral: puet prener forma conica. A masa visceral presenta una paret dorsal con un par de plegos, o manto, que s'abocan sobre o resto d'a masa visceral, embolicando-la. O manto segrega carbonato calcico formando una casca calsinosa.

Entre o manto y o resto d'a masa visceral queda un espacio prou gran cuasi cerrau pero que comunica con l'exterior. Este espacio ye la cambra palial u d'o manto, y ye a on se troba as branquias internas, y a on se recullen os conductos excretors, chenitals y dichestivo.

A casca d'os moluscos ye formada por carbonato calcico en forma d'aragonita y por una proteína dita conquiolina. En a casca d'os moluscos bi ha 3 estratos:

  • Periostraco: exterior, fin y organico.
  • Mesostraco: prou calcificau y pero con conquiolina.
  • Endostraco: interior, con capas d'aragonita y de conquiolina en una estructura prismatica en part.

A denominación de casca[3] coexiste en aragonés moderno con cosca, y se refiere tamién a la cosca d'o uego y a la casca d'os fruitos secos. En aragonés medieval han existiu as variants clasca y closca:

el es enemjgo delas ostias por q(ue) el come su ca(r)ne por maraujlloso enemjgo, e oyres com(m)o el trahe vna chica piedra e g(u)arda q(u)ando la hostia abre sus clasclas o clascas la ora vien(e) el ca(n)cre e gita la piedra dent(r)o en tal man(er)a q(ue) ella no ha poder de çerrar su boca e ella pre(n)de pu(e)s e se la come[4]
E mete(n) enlas rrayzes closcas de muscles / o de pechelid[o]s/ o alga de mar/. E otros son q(ue) toma(n) las ma(n)çanas de las tuberas[5]

Etimolochía

[editar | modificar o codigo]

A denominación cientifica molluscus provién de mollis, tovo. A la vegada molluscus ye una adaptación d'o griego τᾲ μαλάκια, "a cosa tova", que Aristótil aplicó a la sepia.[6]

A parola molluscus no se relaciona etimolochicament con a parola patrimonial aragonesa "musclo", que designa a cualsiquier especie d'a familia Mytilidae[7], y deriva d'o latín mūsculus (como o francés moule y l'anglés mussel[8]), diminutivo de mūs ("ratolín", "zorz").

Referencias

[editar | modificar o codigo]
  1. ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
  2. ↑ Shorter Oxford English Dictionary. Malacology. Little, L., Fowler, H.W., Coulson, J., and Onions, C.T. Oxford University press, 1964
  3. ↑ (es) Fernando Blas Gabarda, Fernando Romanos Hernando: Diccionario Aragonés: chistabín-castellano. (Bal de Chistau). Gara d'Edizions, 2008, p 155.
  4. ↑ (an) "Libro d'el Trasoro"
  5. ↑ (an) "Libro de Paladio"
  6. ↑ Shorter Oxford English Dictionary. Mollusca. Little, L., Fowler, H.W., Coulson, J., and Onions, C.T. Oxford University press, 1964
  7. ↑ (es) María Pilar Lacasa Carrascosa: El habla de Alcolea de Cinca: breve caracterización lingüística y vocabulario. Archivo de filología aragonesa Nº 66, 2010, pp. 193-216, ISSN: 0210-5624
  8. ↑ (en) T. F. Hoad: The Concise Oxford Dictionary of English Etymology. Paw Prints, 2008.

Bibliografía

[editar | modificar o codigo]

Vinclos externos

[editar | modificar o codigo]